བྱིས་པའི་ཁྲག་ཚིལ་མཐོ་བའི་ནད་བརྟག་བཅོས་བྱ་དགོས།
藏文报
作者：
新闻 时间:2016年06月08日 来源:藏文报
དེང་གི་དུས་སྐབས་སུ་ལོ་ཆུང་བྱིས་པ་ཚོའི་འཚོ་བའི་གོམས་གཤིས་མི་ལེགས་པ་དང་། ལུས་ཚོ་བ། བརྗེ་ཚབ་རྟགས་འདུས་ནད་ཇེ་མང་ཡིན་པའི་རྐྱེན་གྱིས། བྱིས་པའི་ཁྲག་ཚིལ་རྒྱུན་ལྡན་མིན་པའི་སྣང་ཚུལ་ལོ་རེ་བཞིན་ཇེ་མང་དུ་འགྲོ་བཞིན་ཡོད།
བྱིས་པའི་ཁྲག་ཚིལ་མཐོ་ན་སྙིང་ཁམས་ཁྲག་རྩར་གནོད།
ན་གཞོན་ལོ་ཆུང་གི་ཁྲག་ཚིལ་རྒྱུན་ལྡན་མིན་པ་ནི་ཆུང་དུས་ཁྲག་ཚིལ་བརྗེ་ཚབ་འཁྲུགས་པ་དང་། སྤྱིའི་མཁྲིས་རྒྱུ་གཤེར་རྩི་དང་མངར་སྣུམ་སུམ་ཐེན་གྱི་ཚད་རྒྱུན་ལྡན་གྱི་དཔྱད་གཞིའི་བསྡུར་ཚད་ལས་མཐོ་བ་སོགས་ཀྱི་དབང་གིས་ཁྲག་ཚིལ་མཐོ་བའི་ནད་བྱུང་བ་རེད། སྔོན་ཆད། སྙིང་ཁམས་ཁྲག་རྩའི་ནད་ཀྱི་ཉེན་ཁ་ཆེ་བའི་རྒྱུ་རྐྱེན་སྟེ་ཁྲག་ཚིལ་མཐོ་བའི་ནད་དེ་རིགས་བྱིས་པའི་དུས་སུ་མི་འབྱུང་། ཡིན་ན་ཡང་། མིག་སྔར། མི་དར་མའི་བདེ་ཐང་ལ་གནོད་པ་ཚབས་ཆེ་བའི་ནད་དེ་བྱིས་པར་ཡང་འབྱུང་བཞིན་ཡོད། ཞིབ་འཇུག་མང་པོ་ལས། འཕར་རྩ་སྲ་འགྱུར་དང་འབྲེལ་བའི་སྙིང་ཁམས་ཁྲག་རྩའི་ནད་སྟེ་སྙིང་གཟེར་ནད་ནི་དར་མའི་དུས་ནས་བཟུང་བྱུང་བ་ཞིག་ཡིན་མོད། འཕར་རྩ་སྲ་འགྱུར་ཀྱི་ནད་གཞི་དེ་བྱིས་པའི་དུས་ནས་ཡོད་པ་ཞིག་ཡིན་པས། སྔ་མོ་ནས་ཞིབ་བཤེར་གསོ་བཅོས་བྱས་ན་སྔོན་འགོག་གི་ནུས་པ་བཟང་བོ་ཐོན་ཐུབ་པ་ཤེས།
བྱིས་པ་ཁ་ཤས་ལ་ཁྲག་ཚིལ་བརྟག་དཔྱད་བྱ་དགོས།
མིག་སྔར། ཆེད་མཁས་པ་མང་པོས་བྱིས་པའི་ཁྲག་ཚིལ་ལ་གདམ་གསེས་རང་བཞིན་གྱི་ཞིབ་བཤེར་བྱེད་དགོས་པའི་གྲོས་གཞི་བཏོན་ཡོད། ལོ་གཉིས་ལ་མ་བུད་པའི་བྱིས་པར་ཁྲག་ཚིལ་ཞིབ་བཤེར་མི་བྱེད་པ་དང་། ལོ་གཉིས་ནས་ལོ་བརྒྱད་བར་གྱི་བྱིས་པ་དང་། ལོ་བཅུ་གཉིས་ནས་ལོ་བཅུ་གསུམ་བར་གྱི་ན་གཞོན་ལོ་ཆུང་ལ་གདམ་གསེས་རང་བཞིན་གྱི་ཁྲག་ཚིལ་ཞིབ་བཤེར་བྱ་དགོས་པ། ཁྲག་ཚིལ་མཐོ་བའི་རྒྱུད་ཡོད་པ་དང་ཕ་མ་གཉིས་ཀྱི་མཁྲིས་རྒྱུ་གཤེར་རྩི་མཐོ་ཞིང་ཁྲག་ཚིལ་རྒྱུན་ལྡན་མིན་པ་དང་། གཅིན་སྙི་ཟ་ཁུ་དང་ཁྲག་ཤེད་མཐོ་བ། མིག་སྔར་དུ་བ་འཐེན་པའམ་ནད་བྱུང་བའི་བྱིས་པའི་ཁྲག་ཚིལ་རྒྱུན་ལྡན་མིན་པ་སོགས་དང་། དེ་མིན་དལ་ལངས་རང་བཞིན་གྱི་ནད་རིགས་སྟེ་དཔེར་ན་སྤྱང་རྨ་དམར་ཁྲ་དང་ལོ་གཞོན་གྱི་གྲུམ་ནད། མཁལ་མའི་རྟགས་འདུས་ནད་སོགས་ཡོད་པ་ལ་གདམ་གསེས་རང་བཞིན་གྱི་བརྟག་དཔྱད་བྱ་དགོས། ལོ་དགུ་ནས་ལོ་བཅུ་གཅིག་བར་དང་ལོ་བཅུ་བདུན་ནས་ལོ་བཅུ་དགུ་བར་གྱི་ན་གཞོན་ལོ་ཆུང་རྣམས་ལ་རྒྱུན་སྲོལ་ཁྲག་ཚིལ་ཞིབ་བཤེར་བྱེད་པའི་གྲོས་གཞི་བཏོན་ཡོད།
སྨན་རྫས་ཀྱིས་གསོ་བཅོས་བྱེད་སྐབས་བྱིས་པའི་སྐྱེ་འཚར་ལ་ལྟ་ཞིབ་ཚད་ལེན་བྱ་དགོས།
ཁྲག་ཚིལ་ཆེས་རྒྱུན་ལྡན་མིན་པའི་བྱིས་པ་དང་ལོ་ཆུང་དག་ལ། ཆུང་དུས་ནས་བཟུང་སྙིང་ཁམས་ཁྲག་རྩའི་ནད་རིགས་འབྱུང་སྲིད་པས། ཁྲག་ཚིལ་ཇེ་དམར་གཏོང་བའི་ཚད་ལྡན་གྱི་གསོ་བཅོས་བྱེད་པ་དང་། ཁྲག་སྐྱོ་མཁྲིས་རྒྱུ་གཤེར་རྩི་ཇེ་དམའ་རུ་བཏང་ནས། སྙིང་ཁམས་ཁྲག་རྩའི་ནད་རིགས་འབྱུང་བར་སྔོན་འགོག་བྱ་དགོས།
ཟས་ཀྱི་གསོ་ཐབས། བཟའ་བཏུང་ཐད་ནས་མཉམ་འཇོག་བྱེད་པ་ནི་བྱིས་པ་དང་ན་གཞོན་ལོ་ཆུང་གི་ཁྲག་ཚིལ་རྒྱུན་ལྡན་མིན་པ་གསོ་བཅོས་བྱེད་པའི་རྨང་གཞི་ཡིན་པས་ཕན་ནུས་ཆེན་པོ་ལྡན། ཁྱད་པར་དུ་ཁྲག་ཚིལ་མཐོ་བའི་ནད་བྱུང་ཡོད་པའི་བྱིས་པར་ཟས་རིགས་ཀྱི་གསོ་ཐབས་སྤྱོད་རྒྱུ་ནི་ཆེས་ཕན་ནུས་ལྡན་པའི་བྱེད་ཐབས་ཤིག་ཡིན། མི་དར་མའི་ཟས་རིགས་ཀྱི་གསོ་བཅོས་བྱེད་ཐབས་ནི་ལུས་པོ་བདེ་ཐང་དང་ལུས་ཀྱི་ལྗིད་ཚད་དོ་མཉམ་ཡིན་པ་སྲུང་འཛིན་བྱ་རྒྱུ་དེ་ཡིན། ན་གཞོན་ལོ་ཆུང་ལ་མཚོན་ན། དེའི་འཚར་སྐྱེ་ལ་གཞིགས་ནས་ཟས་ཀྱི་གསོ་བཅོས་བྱེད་ཐབས་སྤྱོད་པ་ནི་ཁྲག་ཚིལ་མཐོ་བ་ཇེ་དམའ་རུ་གཏོང་བའི་དུས་མཉམ་དུ་འཚོ་བཅུད་འདང་ངེས་ཡོང་བ་ཁག་ཐེག་བྱས་ཏེ། ལུས་པོ་འཚར་སྐྱེ་ལ་ཤུགས་རྐྱེན་མི་ཐེབས་པར་བྱེད་དགོས།
སྨན་གྱི་གསོ་ཐབས། ཁྲག་ཚིལ་ཅུང་ཙམ་རྒྱུན་ལྡན་མིན་པ་ལ། ཟས་ཀྱི་གསོ་ཐབས་སྤྱད་ན་ནད་པའི་ཁྲག་ཚིལ་རྒྱུན་ལྡན་དུ་གཏོང་ཐུབ། ཡིན་ན་ཡང་ཁྲག་ཚིལ་ཆེས་རྒྱུན་ལྡན་མིན་པའི་ལོ་ཆུང་བྱིས་པར་ངེས་པར་དུ་བཟའ་བཏུང་ཕྱོགས་ལ་ཚོད་འཛིན་བྱེད་པའི་རྨང་གཞིའི་སྟེང་སྨན་འཐུང་ནས་གསོ་བཅོས་བྱ་དགོས།།
放大
缩小
默认