ཁྲིམས་ཞེས་པའི་བྱུང་བ་དང་ངོ་བོ་མདོ་ཙམ་བརྗོད་པ།
藏文报
作者：
新闻 时间:2016年06月08日 来源:藏文报
སྤྱིར་ཁྲིམས་ཞེས་པ་ནི་འགྲོ་བ་མིའི་རིགས་འདི་འཇིག་རྟེན་དུ་བྱུང་མ་ཐག་ནས་ཡོད་པ་ཞིག་མིན་པར། དེ་ནི་སྒེར་འཛིན་གྱི་ལམ་ལུགས་དང་གྲལ་རིམ་བྱུང་བ་དང་སྦྲགས་ནས་བྱུང་བ་ཞིག་ཡིན་ཞིང་། ཡ་ཐོག་གི་གདོད་མའི་སྤྱི་ཚོགས་སུ་ཁྲིམས་མེད་ཀྱང་། སྐབས་དེའི་མི་རྣམས་ཀྱི་སྤྱོད་པའི་སྒྲིག་སྲོལ་ནི་ཡུན་རིང་དུ་བརྒྱུད་པའི་སྤྱི་ཚོགས་ཀྱི་འཚོ་བའི་ཁྲོད་ནས་རང་ཤུགས་སུ་བྱུང་བའི་རུས་ཚོའི་མི་སྣ་ཀུན་གྱི་འདུན་པ་དང་ཁེ་ཕན་ལ་རག་ལས་པའི་གོམས་གཤིས་ཤིག་ཡིན་པ་དང་། དེ་ནས་སྤྱི་ཚོགས་ཀྱི་ཐོན་སྐྱེད་ནུས་ཤུགས་དར་སྤེལ་བྱུང་བ་དང་བསྟུན་ཏེ་གདོད་མའི་སྤྱི་ཚོགས་ཐོར་ནས་བྲན་གཡོག་ཅན་གྱི་སྤྱི་ཚོགས་རིམ་གྱིས་གྲུབ། ཐོན་སྐྱེད་ཀྱི་རྒྱུ་ཆ་སྒེར་ལ་དབང་བའི་ལམ་ལུགས་བྱུང་ནས་བྲན་གཡོག་དང་བྲན་བདག་ཞེས་འགལ་ཟླ་གྲུབ་པའི་གྲལ་རིམ་དང་གྲལ་རིམ་ཅན་གྱི་སྤྱི་ཚོགས་བྱུང་བ་དང་། ཆབ་སྲིད་དང་དཔལ་འབྱོར་ཐད་ནས་དབང་བསྒྱུར་མཁན་གྱི་གོ་གནས་ཟིན་པའི་བྲན་བདག་རྣམས་ཀྱིས་རང་ཉིད་ཀྱི་རྩ་བའི་ཁེ་ཕན་དག་འགན་སྲུང་བྱེད་རྒྱུའི་ཆེད་དུ། ཐུན་མོང་མ་ཡིན་པར་སྤྱོད་པའི་སྒྲིག་སྲོལ་ཤིག་བཙུགས་ནས་དབང་བསྒྱུར་གྱི་ཡུལ་དུ་གྱུར་བའི་བྲན་གཡོག་རྣམས་ལ་བཀག་སྡོམ་དང་བཙན་གནོན་བྱས། འདི་ལྟ་བུའི་ཐུན་མོང་མ་ཡིན་པར་སྤྱོད་པའི་སྒྲིག་སྲོལ་ལ་ཁྲིམས་ཞེས་པའི་མཚན་སྦྱར། ཁྲིམས་ཀྱིས་དབང་བསྒྱུར་གྲལ་རིམ་གྱི་འདུན་པ་དང་ཁེ་ཕན་མཚོན་ལ། ཁྲིམས་ནི་དབང་བསྒྱུར་གྲལ་རིམ་གྱི་སྲིད་དབང་སྒེར་འཛིན་བྱེད་སྤྱད་ཀྱི་ཡོ་བྱད་ཀྱང་ཡིན། ཁྲིམས་ཞེས་པ་ནི་གོ་རིམ་མང་ཞིང་རྒྱུན་ཡུན་རིང་ཞིག་བརྒྱུད་ནས་གྲུབ་པ་ཡིན་ལ། དང་ཐོག་ཡི་གེར་ཕབ་མེད་པའི་གོམས་སྲོལ་གྱི་ཁྲིམས་ནས་རྗེས་སུ་བྱུང་བའི་ཡིག་ཐོག་གི་ཁྲིམས་དང་། དེ་ནས་ཅུང་ཙམ་འཐུས་སྒོ་ཇེ་ཚང་དུ་སོང་བའི་ཡིག་ཐོག་གི་ཁྲིམས་ལུགས་བཅས་རིམ་བཞིན་ཇེ་བཟང་ཇེ་རྒྱས་སུ་སོང་བ་ཡིན། ཡིན་ན་ཡང་བཤུ་གཞོག་གྲལ་རིམ་གྱི་བསམ་བློ་མཁན་ཁ་ཤས་ཀྱིས་ནུས་ཤུགས་གང་ཡོད་ཀྱིས་ཁྲིམས་ཀྱི་གྲུབ་ཚུལ་ལ་འཁྱོག་བཤད་གང་མང་བྱས་ཡོད། དཔེར་ན་ཁྲིམས་ཞེས་པ་ནི་ལྷ་ཞིག་གིས་གསར་བཟོ་བྱས་པ་ཡིན་པ་དང་། ཡང་ན་སྤྱི་ཚོགས་ཀྱི་ཆིངས་ཡིག་ལས་བྱུང་བ་ཡིན་པ། ཡང་ན་མི་རིགས་ཤིག་གི་བསམ་བློའི་སྙིང་སྟོབས་མཚོན་པ། ཡང་ན་སེམས་ཁམས་ཀྱི་འགྱུར་ལུགས་ཁ་ཤས་ལས་རང་བྱུང་གིས་གྲུབ་པ་སོགས་ལྟ་བ་སྣ་ཚོགས་པ་ཞིག་བཤད་དེ། ཁྲིམས་ཞེས་པས་གྲལ་རིམ་གྱི་ངོ་བོའམ་རང་བཞིན་ངོ་མ་མཚོན་ཡོད་པ་དེ་འགེབ་རྩིས་བྱས་ཡོད།
གྲལ་རིམ་ཅན་གྱི་སྤྱི་ཚོགས་ནང་དུ། གྲལ་རིམ་སོ་སོར་རང་རང་གི་འདུན་པ་དང་བླང་བྱ་ཡོད་རུང་། དབང་བསྒྱུར་གྲལ་རིམ་ཁོ་ན་ལས་གྲལ་རིམ་གཞན་པ་དག་གི་འདུན་པ་ནི་ཁྲིམས་གནས་སུ་འཕགས་མི་ནུས། རྒྱུ་མཚན་ཅི་ཞིག་ཡིན་ཞེ་ན། ཁྲིམས་ཞེས་པས་དབང་བསྒྱུར་གྲལ་རིམ་གྱི་འདུན་པ་མཚོན་ཞིང་། དབང་བསྒྱུར་གྲལ་རིམ་དང་དབང་བསྒྱུར་ཡུལ་གྲལ་རིམ་བར་གྱི་ཁེ་ཕན་ནི་རྩ་བའི་ཐོག་ཏུ་འགལ་ཟླར་ལངས་ཡོད་རྐྱེན་དེ་གཉིས་ཀྱི་འདུན་པ་དུས་མཉམ་དུ་ཁྲིམས་གཅིག་གི་མ་ལག་ཏུ་བསྡུ་ག་ལ་ནུས། དབང་བསྒྱུར་གྲལ་རིམ་ཁོ་ནས་རང་གི་འདུན་པ་དེ་རྒྱལ་ཁབ་ཀྱི་འདུན་པའི་ཚད་དུ་མཐོར་འདེགས་བྱེད་ནུས་པའམ། ཡང་ན་དེས་རྒྱལ་ཁབ་ཀྱི་དབང་ཆ་ཡོད་པའི་ལས་ཁུངས་བརྒྱུད་ནས་གཏན་འབེབས་བྱེད་རྒྱུའམ་འཐད་པ་བྱུང་རྒྱུ་མ་ཟད། རྒྱལ་ཁབ་ཀྱི་བཙན་དབང་ལ་བརྟེན་ནས་ཁྲིམས་དེ་དག་ལག་ལེན་བྱེད་རྒྱུའི་འགན་ཡང་སྲུང་བར་བྱེད། འབྱོར་ལྡན་གྲལ་རིམ་པའི་ཁྲིམས་སུའང་བཟོ་བ་གྲལ་རིམ་གྱི་ཁེ་ཕན་མཚོན་པའི་ཁྲིམས་ཡིག་ཁ་ཤས་རེ་ཡོད་པ་དཔེར་ན། འདེམས་བསྐོའི་དབང་ཆ་དང་། ལས་མཚམས་འཇོག་པའི་དབང་ཆ། སྤྱི་ཚོགས་ཀྱི་ཕན་བདེའི་དབང་ཆ་བཅས་ཡོད་ཀྱང་། དེ་དག་ནི་བཟོ་བ་གྲལ་རིམ་གྱིས་འཐབ་རྩོད་བྱས་པའི་འབྲས་བུ་ཡིན་ཞིང་། འབྱོར་ལྡན་གྲལ་རིམ་གྱིས་ངོ་རྒོལ་བྱེད་པར་འགོ་གནོན་པའི་ཐབས་ཤིག་ཀྱང་ཡིན་པས། འདིའི་ཐད་ནས་བལྟས་ན་དེའི་སྐོར་གྱི་ཁྲིམས་སུའང་འབྱོར་ལྡན་གྲལ་རིམ་གྱི་འདུན་པ་མཚོན་ཡོད་པ་ཞིག་རེད།
ཁྲིམས་ཀྱིས་དབང་བསྒྱུར་གྲལ་རིམ་གྱི་འདུན་པ་མཚོན་ཡོད་རུང་། དེ་ནི་དབང་བསྒྱུར་གྲལ་རིམ་གྱི་སྤྱིར་སྟངས་ཀྱི་འདུན་པ་ཞིག་ག་ལ་ཡིན། དེས་དབང་བསྒྱུར་གྲལ་རིམ་གྱི་རྒྱལ་ཁབ་རང་བཞིན་ཅན་གྱི་འདུན་པ་མཚོན་ཡོད་ལ། དེས་རྒྱལ་ཁབ་ཀྱི་སྲིད་དབང་ལ་བརྟེན་ནས་དབང་བསྒྱུར་གྲལ་རིམ་གྱི་འདུན་པ་མཚོན་ཡོད་པས། དེ་ནི་ཐུན་མོང་མ་ཡིན་པའི་སྤྱི་ཚོགས་ཀྱི་སྒྲིག་སྲོལ་ཞིག་ཡིན། སྤྱི་ཚོགས་ཀྱི་སྒྲིག་སྲོལ་ཞེས་པ་ནི་སྤྱོད་པའི་སྒྲིག་སྲོལ་དང་། ཆོས་ཀྱི་བཅའ་ཡིག ཡུལ་སྲོལ་གོམས་གཤིས་སོགས་ལ་གོ་ཆོག་ཀྱང་། དེ་མིན་མི་རྣམས་ཀྱི་ཕན་ཚུན་བར་གྱི་འབྲེལ་བ་ལེགས་སྒྲིག་ཏུ་ཡོང་ཆེད་གཏན་འབེབས་བྱས་ཡོད་པའི་བཅའ་ཡིག་ལའང་གོ་ཆོག འོན་ཀྱང་དེར་ཁྲིམས་ལྟར་ཡོངས་ཁྱབ་ལ་བཀག་སྡོམ་བྱེད་ཐུབ་པའི་ནུས་པ་མེད་ལ། སྤྱི་ཚོགས་ཡོངས་ཀྱིས་ངེས་པར་དུ་བརྩི་སྲུང་བྱ་དགོས་པའི་བྱ་སྤྱོད་ཀྱི་བཅའ་ཡིག་ལྟ་བུའང་མིན་པས། དབང་བསྒྱུར་གྲལ་རིམ་གྱིས་རང་ཉིད་ཀྱི་འདུན་པ་དེ་ཁྲིམས་ཀྱི་ལུགས་སུ་ཕབ་སྟེ་རྒྱལ་ཁབ་ཀྱི་སྲིད་དབང་ལས་ཁུངས་ལ་བརྟེན་ནས་གཏན་ལ་ཕབ་པར་བརྟེན་ལག་ལེན་བྱེད་པའི་རྒྱལ་ཁབ་རང་བཞིན་ཅན་གྱི་འདུན་པའི་ཚད་དུ་མཐོར་འདེགས་བྱས་པས། ཁོ་ཚོའི་འདུན་པ་དེར་ཡོངས་ཁྱབ་ཏུ་བཀག་སྡོམ་ཐུབ་པའི་ནུས་པ་ལྡན། དེ་བས་ལེ་ཉིན་གྱིས་གལ་སྲིད་འདུན་པ་དེ་རྒྱལ་ཁབ་ཀྱི་འདུན་པ་ཡིན་ན། དེར་སྲིད་དབང་ལས་ཁུངས་ཀྱིས་གཏན་ལ་ཕབ་ཡོད་པའི་ཁྲིམས་ཀྱི་རྣམ་པ་ཡོད་དགོས། གལ་ཏེ་མིན་ན་འདུན་པ་ཞེས་པའི་ཡིག་འབྲུ་འདི་གཉིས་ནི་དོན་མེད་དུ་གཡོ་འགུལ་བྱེད་བཞིན་པའི་མཁའ་དབུགས་ལྟ་བུའོ་ཞེས་གསུངས་ཡོད།། (རྗེ་ཙོང་ཁ་པའི་དྲ་བ་ལས།)
放大
缩小
默认