བོད་ཀྱི་ས་གདན་ངོ་སྤྲོད།
藏文报
作者：
新闻 时间:2019年06月22日 来源:藏文报
བོད་ཀྱི་ས་གདན་ནི་གནའ་མ་ཟད་དེང་གི་དུས་སུ་ཡང་རྒྱལ་ཁབ་ཕྱི་ནང་དང་ས་གནས་ཀྱི་དབྱེ་བ་མེད་པར། མི་རིགས་ཀྱི་ཁྱད་ཆོས་ལྡན་ཞིང་ཐགས་དངོས་ཀྱི་རྒྱུ་ཆ་བཟང་ལ། ལག་རྩལ་མཐོ་ཞིང་སྤུས་ཀ་ཡག་པའི་ས་གནས་ཐོན་རྫས་ཤིག་ཏུ་བགྲང་གི་ཡོད།
རང་རེའི་ས་གདན་གྱི་རྒྱུ་ཆ་གཙོ་བོ་ནི་བལ་རིགས་ཡིན་ལ། བལ་སྐུད་ཚོས་སྒྱུར་བྱས་ཏེ་དཀར་སེར་དམར་སྔོ་སོགས་ཁ་དོག་སྣ་ཚོགས་སུ་ཕབ་རྗེས་གཞི་ནས་འཐག་ལས་བྱེད་ཅིང་། སྟེང་དུ་སྐལ་བཟང་དང་གངས་ལྷ། པདྨ་སོགས་མེ་ཏོག་གམ་ཤིང་ལོའི་རིགས་མང་བོ་དང་། ནོར་བུ་ཆ་བདུན་དང་བཀྲ་ཤིས་རྟགས་བརྒྱད། མཐུན་པ་སྤུན་བཞི། ཚེ་རིང་རྣམ་དྲུག་སོགས་བཀྲ་ཤིས་པའི་རི་མོ་སྣ་མང་། སྟག་སེང་ཁྱུང་འབྲུག་དང་ཤྭ་དང་ཡུ་མོ་སོགས་སྲོག་ཆགས་ཀྱི་རི་མོ་དུ་མ། གཡུང་དྲུང་དང་དཔལ་བེའུ་སོགས་མཐའ་ཁྱུད་དང་པ་ཊ་སྣ་ཚོགས་ཀྱིས་ཅི་དགར་བརྒྱན་པས། བལྟས་ན་ཚོན་ཁ་གསལ་ཞིང་བཀྲག་མདངས་ལྡན་པ། མཐུག་ལ་དྲོ་བ། འཇམ་ལ་མཉེན་པ། འབྱུང་གཞི་ལ་འཕྲོད་པ་སོགས་ཁྱད་ཆོས་དུ་མ་འཛོམས་ཤིང་། ཆེ་ཆུང་གི་ཆ་ནས་ཀྱང་ཚོམས་ཁང་ལ་ཚོམས་གདན་ཆེན་མོ་ཡུག་ཅིག་གིས་ཧྲིལ་བོར་ཁེབས་པ། འདུ་ཁང་ལ་དགེ་འདུན་བཞུགས་པའི་འབོལ་གདན། དེ་མིན་ཁྲི་ལ་ཁྲིའི་རྒྱབ་ཡོལ་དང་ཀ་རིང་ལ་ཀ་ཐུམ། ཐ་ན་རྟ་འབོག་དང་སྒ་སྟན་ཡན་ཆད་ཀྱི་ཐགས་དངོས་གྲངས་ཀྱིས་མི་ཟིན་པའི་རིགས་ཐོན་སྐྱེད་བྱས་དང་བྱེད་བཞིན་ཡོད་པས། བོད་ཀྱི་ས་གདན་ལག་རྩལ་ནི་གཞན་ལ་ངོ་གནོང་མི་དགོས་པའི་ཚད་ན་ཡོད་དོ།། (སེམས་ཀྱི་ཉི་ཟླའི་བོད་ཡིག་དྲ་བ་ལས།)
放大
缩小
默认